أأحبتى في الله .. الصورة كشفت هوية رسالتنا هذه فكما ترون
في عالم الإنترنت كل شيء صار متطور .. حتى الزواج صار بالنت
عبي إستمارة وإدخل بياناتك وإضغط قبول
يا ترى هذا من الأصول ؟!
كثرت المواقع يرعاكم الله التي تتحدث عن الزواج عن طريق الإنترنت ومعها
كثرت الرسائل الواردة في الـ Junk mail بعنوان قابل شريك حياتك
وقابل شخص مميز من وطنك ! والمراهقين والعيال يالله إدعس الـ Enter
ومع الخيل يا شقرا .. والله ما ني عارف هي شقرا ولا سمرا ولا خضرا ولا صفرا !
سجل في الموقع وتعارف ويالله .. بنات وشباب وعلاقات وصدقات أولها
على الشات وتاليها الشتات !
أولها مرحبا إنتي تبي تتزوجي .. طيب كم عمرك وشو الأكل الي تحبين !
وكأنها ما همها إلا الأكل ! في هالحياة .. وهي مستانسة فرحانة
وجاه الجواب وقالها أنا أحب نفس الي قلتي تصدقين ؟!
وبلا وعي وبلا شعور تحبه وتتعلق فيه ، وتتطور العلاقة بينهم ويا سلام
معقولة بنضل نحكي على الموقع بس يا البي ؟ّ أكيد لا لازم أشوفك
وتشوفيني ! يا حلوة إمتى تقابليني ؟!
ويازينها زيناه مكسوفة كسفة العروس ليلة الزفاف !
لا ما أقدر أشوفك هذا شيء مستحيل ؟ وهي بداخلها تقول عادي كل البنات يقابلون
ويخرجون إلا أنا ! وليه ما أجرب هي تجربة وبتمر ويالله هالمرة
أول وأخر مرة وبس !
وبعد إلحاح ما هو طويل ! وافقت الجميلة .. وإتواعدوا
وحبها وحبته .. وإشتاق لها وإشتاقت له
وصار الموعد موعدين
والحب يكبر ويزيد والموعد يطول من بضعة دقايق
لساعة وساعتين ويالله .. ما حد يدري عني ليه ما أروح ؟!
عادي ؟!
أكيد عادي ! في زمان صار كل شيء فيه عادي
نحب عادي
نكره عادي
نظلم عادي
نهين عادي
نسب عادي
نحتقر الناس عادي
ما نفكر في إخوانا في البيت كيف حالهم مع الدنيا .. عادي ؟
ما أفكر في بنتي ليه مقفلة باب غرفتها بالمفتاح هم عادي ؟
ما أفكر في إبني ليه يداوم يوم الخميس بالجامعة وهي مقفولة عادي ؟
كل شيء عادي كوووول على قولتهم
تجيه مكالمة يلعب بشعره ويقوم بسرعة مكالمة عابرة يمكن عادي ؟
تجيها مكالمة يحمر خدها وهم تلعب في شعرها وبسرعة على الصالون ولا الغرفة
ويالله كله عادي !
خلهم يستانسون هذي حياتهم .. هذي طفولة مراهقة كله عادي !
قلنا إهتم بعيالك .. وراقبهم هذا حقك
قلنا الثقة كويسة ما هي عيب ولكن بحدود وهم هالشيء مو موجود !
لو كان موجود ما كانت خرجت الفتاة وراحت قابلت الحبيب !
ولا كان غابت بالساعات وانت ما تدري هي تدرس مع صديقتها
ولا غرقانة في الظلام .. مع الشيطان والأعوان
أه يا ما أبرد أعصابك تنام ما تفرق معاك
لا أم ولا أسرة ولا عيال !
وجاها اليوم الموعود .. وطلعت مع حبيبها عادي
ولكنه هالمرة غير ، ذئب معاه فريسةما قرر إنها تكون له عادي !
وإفترسها وضيعها وضيع أحلامها الوردية
تبكين ؟ الحين بس بتعرفين قيمة ال عادي في حياتك !
توك ندمتي ؟ توك عرفتي إن في شيء إسمه ألم ! إسمه حزن !
إسمه خسارة !
والحين ! كيف يخفي الذيب أثار الجريمة ؟ هذا ما هو نصر نشهره بل هي هزيمة
هزيمة امام الشيطان إلي مثلهم كل شيء عادي !
عادي .. عادي
وبكت الجميلة وضمته ؟ توك تضميه ! أرجوك لا تتركني
أبيك تتزوجني ! انا ملكك ، أنا روحك ، مو أنا حبيبة قلبك ؟
يقول لها أكيد يا عمري إنت حياتي ، إنتي روحي
إنتي لي بلسم لجروحي ، كلمتين حافظهم من النت ويالله كمل كذب يالحبيب
مو مشكلة إلي تصدق في الأولى بتصدق الباقي عادي !
لا تزعلين بكرة بجيب أهلي وأجيك وأخطبك
فرحت الجميلة ووافقت .. وفعلا وفى الحبيب بالوعد
وفي موعده بالدقيقة حضر وجاب العيد
وإتزوجو .. زواج سريع .. هي إستمارة وقلم وتوقيع
وقبلت به زوجا لي .. وقبلت بها زوجة لي
وما خفي كان أعظم ؟
يا جميلة .. هالحبيب إلي تزوجتية .. ما إتزوجك لأجل يحميك
وللأخرة ياخذ إيدك ، هذا الحبيب له مصلحة لا تصدقي كل من قال لك
أحب انا وأموت فيك !
ولا يسمح لنفسه يتصل عليك ، لأنه ينظر لك نظرة
السلعة الرخصية ، بياخذ منها الي يبيه ثم يرميها ما لها عنده أي قيمة
أو ربما بيتزوجك مثل خوينا الي حكينا عنه من شوي
لكن زواج على ورق وبعد الزواج بتنكشف كل الحقايق
والمستخبي يبان !
طبع خسيس وبهذلة وقلة إحترام ! وسب وإحتقار ومذلة !
وإنتي كنتي معي تخرجين ويمكن بعد ما أخرج من بيتي مع غيري تلعبين ؟
الشك ما بيترك مجال والشيطان أبد ما مات !
ليه مستعجلة ؟!
إصبري ونصيبك بيجيك ، من فوق سبع سماوات إلي الله كاتبه لك راح يجيك
اليوم ولا بكرة ولا بعد سنة أو شهور ما تدرين !
والله لو إنك تحتسبين ؟ وعلى نفسك تحافظين ؟ شوفي أجرك عند ربك شو بيكون ؟
ترى والله ربك رحيم ، رب غفور ربك حنون
يا بنت حواء
ربك يعلم ما في السر وأخفى
وما تدرين وين الحكمة من ربك تكون ؟
يمكن فيها خير لك ؟
ما تدرين ؟
بس المهم لا تعجلي ولا تعجلي ولا تعجلي
وخذيها كلمة مني وإصبري نصيبك بيجيك بإذن الله
وصبرك عند الله لك فيه أجر وإلي مكتوب لك في هالحياة راح تشوفيه
ليه أخسر علاقتي مع ربي من أجل شاب؟
ليه أخسر أخرتي من أجل مكالمة غرامية وحب ؟
ليه أكسر بخاطر أبوي
وأحرج أهلي وإخواتي وأخوي !
ليه أخسر كل الي بنتيه من أجل نزوة من أجل شاب ؟
كل همه في الحياة يلعب بالبنات ما عمر قلبه في يوم حب !
فاضي ما عنده علوم .. يدخل هالمواقع ويدور على البنات وبس ؟
لعب وتضييع وقت
وفوق كل هذا غضب رب ؟!
وإنتي الخسرانة ! فلا تعجلي وتستعجلي
ولزواج النت تقبلي ! ولا مع شباب تخرجي
ولا في مواقع زواج تسجلي !
وإن سجلتي إخرجي ، وقولي
يارب توبة بدون عودة !
إياكي يا أختي ويا بنت خالتي وعمي
تراك من لحمي ودمي
أبونا آدم عليه السلام .. وأمنا حواء عليها السلام
ما دريتي إن أخوك ومن حقي إني أنصحك ؟
إتذكري ولا تستعجلي
إن ما شافوك أمك وأبوك
ترى ربك من فوق شايفك ويسمعك
فتخيلي في الأخرة يا بنت حواء موقفك ؟!
ملاحظة :-
أعتذر على المقال الطويل لكنه تحذير وجب أن ينشر لجميع الفتيات
اللواتي يقعن في مصيدة مواقع الزواج ومنتديات الزواج التي تستبيح ما حرم الله
وتستحل الحرام على الناس بحجة ماكافيلي ( الغاية تبرر الوسيلة )
لا والله لا غاية تبرر الوسيلة يعني لأني أبي اتزوج أروح أحلل الحرام وأغضب ربي ؟
وبكرة أقول يا ريت الي جرى عمره ما كان !
اهلا وسهلا بكـ , لديك: 3 مساهمة .
آخر زيارة لك كانت في : الخميس 1 يناير . 
